திருமணம் விமர்சனம்

சேரன் பல ஆண்டுகளுக்குப் பின்னர் இயக்கி இருக்கும் குடும்பப் படம் திருமணம்.
நாயகன் மகேஷ் (உமாபதி), ஆதிரா (காவ்யா சுரேஷ்) ஆகிய இருவரும் காதல் வயப்படுகின்றனர். இருவீட்டாரது சம்மதத்தையும் பெற்றுவிடுகின்றனர். திருமண தேதி முடிவு செய்யப்படுகிறது. இரு வீட்டாருக்கும் கருத்து மோதல் ஏற்படுகிறது. இது பிரச்னையாகி உரசல்களை ஏற்படுத்துகிறது. இதை எல்லாம் மீறி நாயகனும் நாயகியும் இணைந்தார்களா என்பது மீதிக் கதை.

சில வருடங்களுக்கு முன்னர் ஆர். எஸ். பிரசன்னா இயக்கத்தில் வெளியாக கல்யாண சமயல் சாதம் படத்தின் சாயலில் உள்ளது திருமணம். ஆனால் அதில் பிரச்சன்னா ஏற்படுத்திய சுவாரஸ்யத்தை கொடுக்க சேரன் தவறிவிட்டார்.

திடீர் திருப்பம் என ஒன்றுமே இல்லை. எல்லாரும் எளிதாக கணிக்கக் கூடிய கிளைமாக்ஸ். கரு பழனியப்பன் இயக்கத்தில் சேரன் நாயகனாக நடித்த பிரிவோம் சந்திப்போம் படம் மெகா சீரியல்போல இருக்கிறது என அப்போது விமர்சிக்கப்பட்டது. திருமணம் படத்தை ஒப்பிடும்போது அது எவ்வளவோ மேல் எனலாம். மொத்தத்தில் சேரனின் கம் பேக் ரசிகர்களை அவ்வளவாகக் கவரவில்லை என்பதே நிதர்சனம்.

காலத்துக்கு ஏற்ப அதர பழைய குடும்ப கதையை அப்டேட் செய்துள்ளார். ஆனால் டிவி சீரியல் போல இழுக்கும் செகண்ட் ஹாஃப் மற்றும் சுவாரஸ்யமில்லாமல் ஒலிக்கும் பாடல்கள் படத்தை வளவளவென இழுக்கின்றன. பல ஆண்டுகளுக்குப் பிறகு சேரன் இயக்கும் குடும்பப் படம் என நம்பி அவரது ரசிகர்கள் திரையரங்குக்குள் நுழைந்தால், அவர்களுக்கு கிடைத்ததென்னவோ ஏமாற்றம்தான்.