தயாரிப்பாளர் ஶ்ரீனிவாச ராவ்  இயக்குநர் சிபி சக்கரவர்த்தி இடையேயான பிரச்சனைக்கு தயாரிப்பாளர்கள் சங்கத்தின் மூலம் பேச்சுவார்த்தை மூலம் சுமூகமான தீர்வு !

தயாரிப்பாளர் ஶ்ரீனிவாச ராவ்  இயக்குநர் சிபி சக்கரவர்த்தி இடையேயான பிரச்சனைக்கு தயாரிப்பாளர்கள் சங்கத்தின் மூலம் பேச்சுவார்த்தை மூலம் சுமூகமான தீர்வு !

சென்னை 17 செப்டம்பர் 2026 தமிழ் திரைப்படத் தயாரிப்பாளர்கள் சங்க உறுப்பினரும், ஶ்ரீனிவாச சில்வர் ஸ்கிரீன் நிறுவனத்தின் உரிமையாளருமான திரு. ஶ்ரீனிவாச ராவ் அவர்களுக்கும், இயக்குநர் திரு. சிபி சக்கரவர்த்தி அவர்களுக்கும் இடையே ஏற்பட்ட பிரச்சனை தொடர்பாக, இரு தரப்பினரும் தமிழ் திரைப்படத் தயாரிப்பாளர்கள் சங்கத்தில் புகார் அளித்திருந்தனர்.

இப்புகாரைத் தொடர்ந்து, தமிழ் திரைப்படத் தயாரிப்பாளர்கள் சங்கத்தின் தலைவர் மற்றும் நிர்வாகிகள், நடப்பு சங்க நிர்வாகிகள் மற்றும் தென்னிந்திய திரைப்பட தொழிலாளர்கள் சம்மேளனத்தின் (FEFSI) தலைவர் திரு. ஆர்.கே. செல்வமணி ஆகியோர் இணைந்து, இந்த விவகாரத்தை சுமூகமான முறையில் தீர்த்து வைப்பதற்கான நடவடிக்கைகளை மேற்கொண்டனர்.

கடந்த இரண்டு மாதங்களாக, இரு தரப்பினரையும் நேரில் அழைத்து, அவர்களது கருத்துகள் மற்றும் விளக்கங்களை முழுமையாகக் கேட்டறிந்து, எந்தவொரு தரப்பிற்கும் சாதகமாகவோ அல்லது பாதகமாகவோ இல்லாமல், நடுநிலையான முறையில் தொடர்ந்து பேச்சுவார்த்தைகள் நடத்தப்பட்டன.
திரைப்படத் துறையில் தயாரிப்பாளர்கள், இயக்குநர்கள் மற்றும் தொழிலாளர்கள் இடையே நிலவும் தொழில்முறை உறவுகளும், பரஸ்பர புரிதலும் தொடர்ந்து பாதுகாக்கப்பட வேண்டும் என்ற நோக்கத்துடன், சங்க நிர்வாகிகள் இந்தப் பேச்சுவார்த்தைகளை முன்னெடுத்தனர்.

இரு தரப்பினரின் கருத்துகள் மற்றும் அவர்களுக்கிடையே ஏற்பட்ட பிரச்சனையின் பல்வேறு அம்சங்களை கவனமாக பரிசீலித்த பின்னர், அனைவருக்கும் ஏற்ற வகையில் சுமூகமான தீர்வு காண்பதற்கான முயற்சிகள் மேற்கொள்ளப்பட்டன.

இந்த தொடர் பேச்சுவார்த்தைகளின் பயனாக, திரு. ஶ்ரீனிவாச ராவ் மற்றும் இயக்குநர் திரு. சிபி சக்கரவர்த்தி ஆகியோருக்கு இடையே எழுந்திருந்த பிரச்சனை சுமூகமாக தீர்க்கப்பட்டுள்ளது என்பதை மகிழ்ச்சியுடன் தெரிவித்துக் கொள்கிறோம்.

இந்த விவகாரத்தில் எந்தவொரு தரப்பையும் குறை கூறாமல், இரு தரப்பினரின் நலன்களையும் கருத்தில் கொண்டு, அமைதியான முறையில் பேச்சுவார்த்தை நடத்தி தீர்வு காண்பதற்கு ஒத்துழைத்த இரு தரப்பினருக்கும் சங்கத்தின் சார்பில் நன்றியைத் தெரிவித்துக் கொள்கிறோம்.

மேலும், இந்தப் பிரச்சனைக்கு சுமூகமான தீர்வு ஏற்படுவதற்கு கடந்த இரண்டு மாதங்களாக தொடர்ந்து பேச்சுவார்த்தைகளை முன்னெடுத்து, இரு தரப்பினருக்கும் இடையே நல்ல புரிதலை ஏற்படுத்தி தீர்வு காண்பதில் முக்கிய பங்காற்றிய தமிழ் திரைப்படத் தயாரிப்பாளர்கள் சங்கத்தின் தலைவர், நிர்வாகிகள் மற்றும் நடப்பு சங்க நிர்வாகிகள், அத்துடன் தென்னிந்திய திரைப்பட தொழிலாளர்கள் சம்மேளனத்தின் தலைவர் திரு. ஆர்.கே. செல்வமணி ஆகியோருக்கும் நன்றியையும் பாராட்டையும் தெரிவித்துக் கொள்கிறோம்.